գլխավոր Իրադարձային ՊՎԾ–ն այսօր ստուգումների հանձնարարականով այցելել է Սյունիքի համայնքապետերին. 168.am

ՊՎԾ–ն այսօր ստուգումների հանձնարարականով այցելել է Սյունիքի համայնքապետերին. 168.am

168.am-ի տեղեկություններով՝ այսօր Պետական վերահսկողական ծառայությունը ստուգումների հանձնարարականով շտապել է այցելել Սյունիքի այն համայնքապետերին, որոնք խիստ զուգադիպությամբ ընդամենն օրեր առաջ հայտնել էին նոր՝ «Վերածնվող Հայաստան» կուսակցության ստեղծման մասին:

Նրանք այն համայնքապետերն են, որոնք ամիսներ շարունակ բարձրաձայնում են պատերազմից հետո Սյունիքում առկա անվտանգային խնդիրների եւ կառավարության անգործության մասին:

Թե ինչո՞ւ է ՊՎԾ-ն հանկարծ հիշել Գորիսի, Սիսիանի, Մեղրու, Քաջարանի համայնքապետերին՝ կայքը փորձել է ճշտել հենց նրանցից:

168.am-ին հաջողվել է կապ հաստատել Սիսիանի համայնքապետ Արթուր Սարգսյանի եւ Մեղրու համայնքապետ Մխիթար Զաքարյանի հետ. նրանք հաստատել են ՊՎԾ ստուգումների մասին տեղեկությունները:

«Այսօր եկել են հանձնարարականով ստուգումները սկսելու»,- ասել է Սիսիան համայնքի ղեկավարը՝ նկատելով, որ չի ցանկանում քաղաքականացնել:

Թե ինչ առիթով են եկել ստուգումների՝ կայքի  հարցին ի պատասխան՝ Արթուր Սարգսյանն ասել է. «Ասում են, որ հանձնարարագիր կա, հանձնարարագրով եկել են ստուգումների՝ 2016 թվականից՝ իմ  պաշտոնավարումից,  մինչեւ այսօր»:

Նա նաեւ տեղեկացրել է, որ ստուգումները տեւելու են մարտի 24-ից մինչեւ ապրիլի 30-ը:

Մեղրու համայնքապետն էլ նշել է, որ դեռ չի հանդիպել ՊՎԾ աշխատակիցների հետ, քանի որ գործով Կապանում է եղել, սակայն տեղյակ է, որ համայնքապետարանում են, եւ պատրաստվում է հանդիպել:

Մխիթար Զաքարյանի խոսքով, ՊՎԾ-ն առաջին անգամ է ստուգումներ անցկացնում իրենց համայնքում. «Նորմալ ստուգումը մենք ընկալում ենք՝ որպես հնարավորություն ավելի բարելավելու աշխատանքը: Եթե օբյեկտիվ ստուգում լինի, մենք դա ընկալում ենք հնարավորություն՝ սխալներն ուղղելու, բայց տեսնենք, էլի»:

Արդյոք քաղաքական դրդապատճառներ տեսնո՞ւմ է՝ 168.am-ի հարցին համայնքի ղեկավարը պատասխանել է. «Այս պահին, գիտեք, անմեղության կանխավարկածը խախտած կլինեմ: Իհարկե, շատ բան եմ մտածում, բայց մինչեւ հիմք չունենամ, ճիշտ չի լինի արտահայտվել:

Խնդիր չեմ տեսնում առայժմ. ստուգման ընթացքից մնացածը կերեւա»:

Ըստ նրա տեղեկությունների՝ ստուգումները տեւելու են մեկ ամիս:

Հիշեցնենք՝ հենց հունվար ամսին վարչապետի որոշմամբ Պետական վերահսկողական ծառայության ղեկավար էր նշանակվել «Իմ քայլը» խմբակցության նախկին պատգամավոր, «Քաղաքացիական պայմանագիր» կուսակցության հիմնադիր անդամ Տիգրան Ուլիխանյանը: