գլխավոր Իրադարձային Ես չեմ տեսել Օնիկ Գասպարյանին․ կատարում եմ ԺՊ-ի պարտականությունները․ Ստեփան Գալստյան

Ես չեմ տեսել Օնիկ Գասպարյանին․ կատարում եմ ԺՊ-ի պարտականությունները․ Ստեփան Գալստյան

Օնիկ Գասպարյանի՝ Գլխավոր շտաբի պետ լինել-չլինելու հարցը շարունակում է օդում կախված մնալ։ Մինչեւ այսօր տարբեր մեկնաբանություններ կան նրամ ազատման հետ կապված։ Բանն այն է, որ ՀՀ վարչական դատարանի դատավոր Մհեր Պետրոսյանը վարույթ է ընդունել ԳՇ պետ Օնիկ Գասպարյանի հայցը, եւ Վարչական դատավարության մասին օրենսգրքի 83-րդ հոդվածը տվյալ դեպքում հստակ սահմանում է, որ եթե վիճարկման հայց է ներկայացվել վարչական ակտի դեմ, եւ դատարանը վարույթ է ընդունել, ապա օրենքի ուժով այդ ակտի կատարումը կասեցվում է մինչեւ վերջնական դատական ակտ կլինի այդ գործով: Ստացվում է, որ Օնիկ Գասպարյանը պետք է վերադառնա աշխատանքի։ Այս մասին գրում է Hraparak.am-ը։

Լրատվամիջոցի պնդմամբ՝ մինչդեռ պաշտպանության նախարար Վաղարշակ Հարությունյանի հրամանով շտաբի պետի ժամանակավոր պաշտոնակատար է նշանակվել ՀՀ ԶՈՒ ԳՇ պետի տեղակալ Ստեփան Գալստյանին։

Դատարանում Օնիկ Գասպարյանի ներկայացուցիչ Արթուր Հովհաննիսյանը պնդում է՝ իր վստահորդն արդեն երկու օր է՝ գնում է աշխատանքի․

«Երեկ էլ, այսօր էլ Օնիկ Գասպարյանը գնացել է աշխատանքի, իսկ ԺՊ-ն աշխատում է մինչեւ Գենշտաբի պետի բացակայությունը։ Եթե կա Գլխավոր շտաբի պետ, ԺՊ այլեւս չկա։ Ստեփան Գալստյանն իհարկե ԺՊ չէ, ԺՊ լինում են այն  դեպքում, երբ չկա ղեկավարը։ Ո՞նց է՝ նախարարը չկա, տեղակալը ԺՊ է լինում, որ պահից նախարարը եկավ՝ ԺՊ էլ չկա»։

Հակասությունն այստեղ է՝ ԺՊ նշանակված Ստեփան Գալստյանը Hraparak.am-ի հետ զրույցում հայտնում է, որ ինքը կատարում է պետի պարտականությունները.

«Գիտեք ինչ կա, ճիշտ կլինի մի խառնեք սեւը սպիտակի, սպիտակը սեւի հետ, հանգիստ թողեք ծառայենք, մենք ուրիշ խնդիրներ ունենք։ Ես իմ պարտականությունները կատարում եմ, հրաման տեսե՞լ եք, որ ինձ հանել են, որ չեք տեսել, հանգիստ մնացեք։ Ես ասում եմ՝ կատարում եմ իմ պարտականությունները ԺՊ-ի»։

Հարցին, թե Օնիկ Գասպարյանը երբ գալիս է աշխատանքի ինչո՞վ է զբավում է, գեներալ-լեյտենանտը պատասխանեց․

«Ես չեմ տեսել,  դու ինձ ասում ես, ես ասում եմ՝ չեմ տեսել։ Ես ստեղ նստած, իմ գործը կատարում եմ,  ժողովի եմ, առավոտից էլ ջուր չեմ խմել։ Տված է չէ՞, որ ժամանակավոր պաշտոնակատար ես եմ, դրանից հետո ուրիշ հրաման տեսե՞լ եք»։

Արձագանքին, թե դատարանի որոշումն ենք տեսել, նա պատասխանեց․

«Այդ դատարանի որոշումը… երբ կլինի պաշտոնական թուղթ, երբ անհասկանալի բան կլինի, էդ վախտ ես կպատասխանեմ»։

Ողջ օրվա ընթացքում մենք փորձեցինք մեկնաբանություն ստանալ նաեւ ՊՆ-ից եւ Գլխավոր շտաբի մամուլի խոսնակից, սակայն լրատվամիջոցի զանգերը մնացին անպատասխան։

Հիշեցնենք, որ փետրվարի 25-ին ՀՀ վարչապետը հանրապետության նախագահին էր ներկայացրել առաջարկություն՝ ՀՀ ԶՈՒ գլխավոր շտաբի պետ Օնիկ Գասպարյանին զբաղեցրած պաշտոնից ազատելու վերաբերյալ՝ կցելով համապատասխան հրամանագրի նախագիծը: Նախագահը այն առարկություններով վերադարձրեց, փետրվարի 28-ին գրություն ուղարկվեց ՀՀ նախագահին՝ համապատասխան հիմնավորումներով, եւ Օնիկ Գասպարյանը իրավունքի ուժով ազատվեց պաշտոնից։ Ու այժմ՝ դատարան դիմելուց հետո իրավունքի ուժով Գասպարյանը մնում է ԳՇ պետ։