գլխավոր Իրադարձային Մոլդովայում ազգային սուգ է հայտարարվել

Մոլդովայում ազգային սուգ է հայտարարվել

Մոլդովայի նախագահ Մայա Սանդուն այսօր հրամանագիր է ստորագրել, ըստ որի՝ 2021 թվականի մարտի 15-ը հայտարարվել է ազգային սգո օր՝ կապված գրող Նիկոլայ Դաբիժայի մահվան և հուղարկավորության հետ:

Այս մասին հայտնում է պետության ղեկավարի մամուլի ծառայությունը, գրում է esp.md-ն:

Նշվում է՝ ազգային սուգը հայտարարվել է «ի նշան խորը տխրության, որն առաջացրել է հայտնի գրողի, Ազգային վերածննդի շարժման առաջատար աջակցի, Մոլդովայի Հանրապետության անկախության հռչակագիրը ստորագրած ակադեմիկոսի և գրականագետի մահվան բոթը»:

Հրամանագրի համաձայն, ամբողջ հանրապետությունում իջեցվել են պետական դրոշները, իսկ ժամը 12:00-ին մեկ րոպե լռությամբ երկրի բնակիչները հարգել են Նիկոլայ Դաբիժիի հիշատակը: Հուղարկավորության արարողությունը ուղիղ կհեռարձակի Teleradio-Moldova-ն:

Միևնույն ժամանակ, պետական գերատեսչություններին, ձեռնարկություններին և կազմակերպություններին խորհուրդ է տրվում չանցկացնել զանգվածային ժամանցային միջոցառումներ, իսկ լրատվամիջոցներին կոչ է արվում «հաշվի առնել օրվա առանձնահատկությունները լուրեր հրապարակելիս և ծրագրեր պատրաստելիս»:

Նշենք՝ բանաստեղծ և արձակագիր Նիկոլայ Դաբիժայի մոտ վերջերս կորոնավիրուսային հիվանդություն էր հայտնաբերվել, որը բավականին ծանր ընթացք ուներ: Նա մահացել է մարտի 12-ին հիվանդության պատճառով առաջացած կողմնակի բարդություններից: