գլխավոր Իրադարձային Նիկոլ Փաշինյանն ամբողջությամբ Աննա Հակոբյանի ազդեցության տակ է. Գեղամ Նազարյան (տեսանյութ)

Նիկոլ Փաշինյանն ամբողջությամբ Աննա Հակոբյանի ազդեցության տակ է. Գեղամ Նազարյան (տեսանյութ)

«Այլընտրանքային նախագծեր խմբի» անդամ Գեղամ Նազարյանը 168.am-ի հետ զրույցում ասաց, որ իր զոհված որդին իր ընկերների հետ սեպտեմբերի 28-ից առաջին գծում է եղել, սեպտեմբերի 29-ին է զոհվել, և գտել են մարմինը հունվարի երեքին:

Նա հայտնեց, որ «Ճշմարտությունը սերունդների համար» նախաձեռնությամբ է հանդես գալու, որը լինելու է փաստահավաք խմբի նման մի բան: «Դավիթ Տոնոյանը, հասկանալով վիճակը, երրորդ-չորրորդ օրը պետք է հրաժարական տար, քանի որ ասում էր՝ նոր պատերազմ` նոր տարածքներ: Նիկոլն իր ասածների համար պետք է պատասխան տար: Նիկոլն ուղիղ տարավ այս պատերազմը, այս պատերազմը չէր լինի, եթե Նիկոլը իր գործողություններով, հայտարարություններով չտաներ դրան: Ինքը, հայտարարելով «Արցախը Հայաստան է ու վերջ», բացեց Արցախի դարպասները ոչ միայն Ադրբեջանի, այլ նաև Թուրքիայի համար»,-ասաց նա:

Գեղամ Նազարյանը նշեց, որ եթե Նիկոլ Փաշինյանի արածները դիտավորություն չէին, պետք է Նիկոլ Փաշինյանը հրաժարական տար, բայց նա նույնիսկ ներողություն չի խնդրել: Նա նշեց, որ նույնիսկ Իլհամ Ալիևը, Էրդողանը իրենց թույլ չէին տա ասել, որ Շուշին «ադրբեջանական» է: «Նիկոլ Փաշինյանը մակերեսային, դատարկ տղա է, ռոբոտ է, նա ունի զրոյական գիտելիքներ»,-ասաց նա:

Ըստ նրա՝ Նիկոլ Փաշինյանին աջակցողներ չկան: «Բացի թափթփուկ պատգամավորներից և նրանց ֆեյսբուքյան կեղծանուն էջերից՝ Նիկոլին ոչ մեկը չի աջակցում: Նիկոլը պետք է կանգնի և պարզ ասի, թե ով թույլ չի տալիս հրաժարական տալ»,-ասաց Գեղամ Նազարյանը և հարց բարձրացրեց, թե արցախցի հրամանատարները բունկերում ինչպես են հանդուրժել Աննա Հակոբյանին, և ինչ էր անում Աննան այնտեղ:

«Նիկոլի փրկությունը սա է. նա պետք է օր առաջ խնդրի իրեն ձերբակալել և դատավարություն սկսել իր ամբողջ թիմի հետ: Ես նայում եմ Նիկոլի աչքերին և ասում եմ՝ Նիկոլ՛, դո՛ւ ես սպանել իմ Աբգարին, մնացած աբգարներին, Դավիթին, Արամին, Արմանին, այդ 7 հազար տղաներին դո՛ւ ես սպանել քո հանցավոր գործողությունների արդյունքում, դու պետք է խնդրես քեզ, Աննային շուտ դատեն, թե չէ ժողովուրդը այս շոկից դուրս է գալու և վերահսկողությունից դուրս գա: Նիկոլը իմ տղային սպանեց, բայց ես ուզում եմ Մարիամիկը, Արփին, Աշոտիկը, Շուշանը ապրեն, ուզում եմ երջանիկ լինեն, բայց դրա համար մեկ պայման կա` Նիկոլը պետք է մեր նյուրնբերգյան դատավարությամբ դատվի Աննայի հետ միասին»,-ասաց նա:

Գեղամ Նազարյանը նշեց, որ Նիկոլ Փաշինյանն ամբողջությամբ Աննա Հակոբյանի ազդեցության տակ է, և որևէ մարդ այս աշխարհում չկա, որ փոքր-ինչ մրցակցի Աննայի հետ: «Այսօրվա իմ քայլական պատգամավորները, եթե հանկարծ անկեղծանան, կասեն, որ խմբագրությունում այս միտքը շատ էր հնչում` առանց Աննայի Նիկոլն այլ մարդ է, Աննայի ներկայությամբ՝ բոլորվին այլ մարդ»,-ասաց նա: