գլխավոր Գլխավոր Ընդդիմության կողմից հնչող կոչերը հանրության աջակցությունը չեն ստանում․ Փաշինյան

Ընդդիմության կողմից հնչող կոչերը հանրության աջակցությունը չեն ստանում․ Փաշինյան

Նիկոլ Փաշինյանը ՏԱՍՍ-ին տված հարցազրույցում անդրադարձել է Արցախի հարցով ստորագրված եռակողմ հայտարարությունից հետո ՀՀ-ում ստեղծված ներքաղաքական վիճակին ու նրա հրաժարականի պահանջին։

«Մեզ մոտ, իհարկե, կա ներքաղաքական լարվածություն: Բայց ճշմարտությունն այն է, որ ընդդիմության կողմից հնչեցված կոչերը լայն տարածում չգտան հայ հանրության շրջանում: Եվ ես կարծում եմ, որ ժողովրդի կողմից ձևավորված իշխանության հարցը կարող է լուծվել միայն ժողովրդի կամարտահայտությամբ: Ներկայում փաստն այն է, որ ընդդիմության կողմից հնչող կոչերը հայ հանրության աջակցությունը չեն ստանում: Եվ դա պետք է արձանագրել»,-ասել է Փաշինյանը:

Խոսելով արտահերթ խորհրդարանական ընտրությունների կոչերի մասին, նա նշել է, որ հիմա ոչ միայն կառավարության, այլև Հայաստանի Հանրապետության բոլոր քաղաքական ուժերի կարևորագույն և առաջնահերթ խնդիրը պետք է դառնա Հայաստանի Հանրապետության լիակատար կայունության և անվտանգության վերականգնումը:

«Նկատի ունեմ ոչ միայն ներքին, այլև արտաքին անվտանգությունը: Ես հրապարակել եմ ճանապարհային քարտեզ 6-ամսյա ժամանակահատվածի համար, և առաջիկա 6 ամսվա ընթացքում մենք պետք է աշխատենք իրավիճակի կայունացման ուղղությամբ: Ես նկատի ունեմ քաղաքական իրավիճակը, անվտանգության ոլորտում իրավիճակը, տնտեսական կայունությունը: Եվ դրանից հետո մենք կխորհրդակցենք մեր հանրության, ժողովրդի, քաղաքական ուժերի հետ և որոշում կկայացնենք հետագա իրադարձությունների ու հետագա քայլերի կապակցությամբ, թե ինչ պետք է անենք հետագայում»: