գլխավոր Քաղաքականություն «Չպետք է կանգնել ոչ մի օր ու ժամ»․ Արման Թաթոյան

«Չպետք է կանգնել ոչ մի օր ու ժամ»․ Արման Թաթոյան

ՀՀ Մարդու իրավունքների պաշտպան Արման Թաթոյանն իր ֆեյսբուքյան էջում գրառում է կատարել, որում ասվում է․

«Ադրբեջանի զինված ուժերը Արցախում կատարել են պատերազմական հանցագործություններ։ Նրանք կատարել են մարդկության դեմ ուղղված հանցագործություններ Արցախի ու Հայաստանի քաղաքացիական բնակչության նկատմամբ։ Արգելված զինատեսակներով ավերել են խաղաղ գյուղեր ու քաղաքաքներ, մանկապարտեզներ ու դպրոցներ, կրոնական ու մշակութային օջախներ: Մեր հայրենակիցների նկատմամբ կատարվել են խոշտանգումներ ու դաժանություններ միայն այն բանի համար, որ նրանք էթնիկ հայ են։ Ու այդ ամենը նրանք կատարել են բացառիկ ցինիզմով ու տեռորիստական մեթոդներով՝ կյանքի, առողջության, արժանապատիվ վերաբերմունքի, սեփականության ու շատ այլ իրավունքների ամենակոպիտ խախտումներով:Էթնիկ զտումների ու ցեղասպանության այս քաղաքականությունն ուղեկցվել է էթնիկ հայերի նկատմամբ խորքային ատելության ու թշնամանքի համակարգված քարոզի պայմաններում։Մենք ուղղակի պարտավոր ենք անդադար աշխատանքով այս վայրագությունների համար պատասխանատվության հարցերը հասցնել մինչև վերջ՝ յուրաքանչյուրս մեր գործով: Հայաստանի մարդու իրավունքների պաշտպանի առավելագույն իրավական հնարավորություններով հիմա էլ շարունակվում են բոլոր աշխատանքները, չպետք է կանգնել ոչ մի օր ու ժամ»: