գլխավոր Քաղաքականություն Beringer Aero ընկերությունը դադարեցրել է իր արտադրանքի մատակարարումները, որոնք օգտագործվել են թուրքական...

Beringer Aero ընկերությունը դադարեցրել է իր արտադրանքի մատակարարումները, որոնք օգտագործվել են թուրքական «Բայրաքթար» անօդաչուներում

Ամերիկայի «Հայ դատի» հանձնախումբը հայտնում է, որ ֆրանսիական Beringer Aero ընկերությունը, որի արտադրած հերմետիկ տարաները՝ նախատեսված ինքնաթիռների համար, հայտնաբերվել էին հայերի դեմ կիրառված թուրքական «Բայրաքթար» խոցված անօդաչուում, հաստատել է այդ փաստը:

«Մեր արտադրանքը սխալ նպատակով է օգտագործվել, և մենք արդեն դադարեցրել ենք մատակարարումները: Այդ ապրանքներն արտադրվել և վաճառվել են Beringer Aero France-ի կողմից, ամերիկյան մասնաճյուղը ներգրավված չի եղել»,- ասվում է ընկերության ներկայացուցչի հայտարարության մեջ:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 46 քաղաքացիական անձ, վիրավորվել է 144 քաղաքացիական անձ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։