գլխավոր Աշխարհ ԱՄՆ-ի պատժամիջոցները ՌԴ-ին չեն ստիպի հրաժարվել սեփական ուղուց. դեսպանատուն

ԱՄՆ-ի պատժամիջոցները ՌԴ-ին չեն ստիպի հրաժարվել սեփական ուղուց. դեսպանատուն

Վաշինգտոնի պատժամիջոցները Մոսկվային չեն ստիպի հրաժարվել սեփական ուղղուց, ռուսական արտահանման նկատմամբ սահմանափակող նոր միջոցներն էլ արտասահմանյան գործընկերներին են վնաս հասցնում։ Այս մասին ասվում է Վաշինգտոնում ՌԴ դեսպանատան հայտարարության մեջ։

Ավելի վաղ ԱՄՆ-ն արտահանման սահմանափակում էր մտցրել 24 ընկերությունների, այդ թվում` ռուսաստանցի 10 իրավաբանական անձի դեմ` Նահանգների ազգային անվտանգության կամ օտարերկրյա քաղաքական շահերի դեմ գործողությունների պատճառով։ Ռուսական ընկերությունների ցանկում 10 ձեռնարկության անուն է նշվում` ներառյալ «Ռուսէլեկտրոնիքս», «Միլանդր», «Միլուր» և այլ ընկերություններ։

Ինչպես ասվում է դեսպանատան մեկնաբանության մեջ` ռուսական բարձրտեխնոլոգիական ընկերությունների դեմ նոր սահմանափակումները սեփական պատժամիջոցային «քաղցը» հագեցնելու վարչակազմի հերթական փորձերն են։

Նշվում է, որ որոշ ընկերությունների նկատմամբ սահմանափակումներ են կիրառվում արդեն երկրորդ անգամ։

«Տեղի իշխանությունների նման քայլերը միայն հաստատում են ամերիկյան ոչ լեգիտիմ միջոցների անարդյունավետությունը։ Մատնանշում, որ Ռուսաստանի նկատմամբ ճնշումների գործիքակազմը սպառվում է։ ԱՄՆ–ի նման «պոռթկումները» անհեռանկարային են։ Դրանք պարզապես չեն կարող բերել ցանկալի արդյունքը` ստիպել մեր երկրին արտաքին քաղաքականության մեջ հրաժարվել ինքնիշխան վարքագծից և պաշտպանել ազգային շահերը», – ընդգծել են դիվանագիտական առաքելությունից։

Դեսպանատանն ընդգծել են նաև մասնավոր բիզնեսի վրա Վաշինգտոնի ճնշման կործանարար հետևանքը։

«Առաջին հերթին այդ սահմանափակումներից կտուժեն արտասահմանյան գործընկերները։ Հենց այդպես է լինում համաշխարհային պարենային և էներգետիկ հարթակներից ռուսական արտահանումը դուրս մղելու` Սպիտակ տան ոչ շուկայական նախաձեռնությունների հետևանքով», – ասվում է հաղորդագրության մեջ։