գլխավոր Գլխավոր Ես իմ մանդատը վայր չեմ դնելու, ՀՅԴ Գերագույն մարմինը այդպես է որոշել․...

Ես իմ մանդատը վայր չեմ դնելու, ՀՅԴ Գերագույն մարմինը այդպես է որոշել․ Իշխան Սաղաթելյան

Չեմ թաքցնի՝ մանդատը վայր դնելու վերաբերյալ քննարկում եղել է։ Ազգային ժողովում լրագրողների հետ ճեպազրույցում այս մասին ասել է «Հայաստան» խմբակցության պատգամավոր, ՀՅԴ ԳՄ ներկայացուցիչ Իշխան Սաղաթելյանը` անդրադառնալով մամուլում շրջանառվող խոսակցություններին, որ ի թիվս ընդդիմադիր այլ պատգամավորների, ինքը ևս որոշել է վայր դնել պատգամավորական մանդատը։

«Նման քննարկում եղել է, բայց ՀՅԴ Գերագույն մարմինը կայացրել է որոշում, որ «Հայաստան» խմբակցության բոլոր դաշնակցական պատգամավորները պետք է մասնակցեն խորհրդարանի աշխատանքներին։ Դաշնակցության մեջ անհատական որոշումներ չկան այլևս, երբ որ կա ԳՄ որոշում։ Հետևաբար` ես իմ մանդատը վայր չեմ դնելու»,–ասել է Սաղաթելյանը։

Նրա խոսքով` եթե մանդատներից հրաժարվեին, պետք է ՀՅԴ-ական բոլոր պատգամավորներով դա անեին։ Այս դեպքում որոշում ունեն մասնակցելու ԱԺ աշխատանքներին։

Նշենք, որ օրերս պատգամավորական մանդատից հրաժարվեց «Հայաստան» խմբակցության պատգամավոր Արամ Վարդևանյանը, ապա հայտնի դարձավ, որ «Հայաստան» դաշինքի մաս կազմող «Վերածնվող Հայաստան» կուսակցությունն է դադարեցնում գործունեությունը ՀՀ Ազգային ժողովում. կուսակցության անդամ չորս պատգամավորներից երեքը՝ կուսակցության նախագահ Վահե Հակոբյանը, փոխնախագահներ Հռիփսիմե Ստամբուլյանն ու Ելենա Կիրակոսյանն դիմում են ներկայացրել մանդատներից հրաժարվելու վերաբերյալ: