գլխավոր Առողջություն Մասնագետը բացատրել է՝ ինչու չի կարելի ստամոքսի այրոցը բուժել սոդայով

Մասնագետը բացատրել է՝ ինչու չի կարելի ստամոքսի այրոցը բուժել սոդայով

Կերակրի սոդային գործածությունը ստամոքսի այրոցի դեմ պայքարի ամենատարածված միջոցներից մեկն է, սակայն այս մեթոդը կարող է հանգեցնել ստամոքսի խոցի ու քաղցկեղի զարգացման։ Այս մասին gazeta.ru-ի հետ զրույցում ասել է գաստրոէնտերոլով Սերգեյ Վյալովը։

Բժշկի խոսքով՝ սոդայի գործածությունն ուտելուց հետո ի հայտ եկող տհաճ զգացողություններից ազատվելու համար անարդյունավետ է, քանի որ այն միայն կարճատև ազդեցություն է ունենում։ Այն չի ազատում պատճառից, որով էլ պայմանավորված է լինում ստամոքսից թթվի արտանետումը կերակրափող։

«Ստամոքսից թթվի մշտական արտանետումը կերակրափող վնասում ու բորբոքում է դրա լորձաթաղանթը։ Կարճաժամկետ հեռանկարում դա կարող է հանգեցնել խոցերի, արյունահոսության, սպիացման, իսկ երկարաժամկետ հեռանկարում՝ կերակրափողի քաղցկեղի: Գոյություն ունի բուժում, որը կարող է ձեզ ազատել այս բարդություններից, սակայն սոդան անզոր է դրանց դեմ, քանի որ այն գործում է շատ կարճ ժամանակահատված՝ նույնիսկ ոչ թե ժամեր, այլ րոպեներ», – նշել է բժիշկը։

Սոդայի կանոնավոր գործածությունը հանգեցնում է գազերի ավելորդ կուտակման։ Ավելին՝ բժշկական պրակտիկայում եղել են դեպքեր, երբ սոդայի ընդունումը հանգեցրել է ստամոքսի պատի թափածակման։ Բացի այդ, սոդան մեծացնում է աղաթթվի արտադրությունը, որը ներսից քայքայում է ստամոքսի հյուսվածքները։

«Այրոցի ժամանակ անընդհատ սոդայի լուծույթ խմելու դեպքում արյունը հիմնայնանում է։ Ոչ այն աստիճանի, որ հայտնվեք ինտենսիվ թերապիայի բաժանմունքում, սակայն բավական է լինում մեզի հիմնայնությունը բարձրացնելու համար։ Իսկ եթե դա մշտական բնույթ ստանա, ապա երիկամներում կառաջանան ֆոսֆատային քարեր, որոնք հնարավոր չէ լուծել և կարող են միայն հեռացվել»,- հավելել է գաստրոէնտերոլոգը՝ նշելով, որ ստամոքսի այրոցի հաճախակի նոպաների դեպքում հարկավոր է դիմել մասնագետին ու հետևել նրա ցուցումներին, որոնք կօգնեն ազատվել տհաճ խնդրից առանց առողջությանը վնաս հասցնելու։