գլխավոր Աշխարհ Սահակաշվիլին ափսոսում է Վրաստան վերադառնալու համար

Սահակաշվիլին ափսոսում է Վրաստան վերադառնալու համար

Վրաստանի դատապարտված նախկին նախագահ Միխեիլ Սաակաշվիլին գիտակցում է, որ սխալ է թույլ տվել հայրենիք վերադառնալով։ Այս մասին հայտարարել է նրա որդին՝ Էդուարդ Սահակաշվիլին, հորը հիվանդանոց այցելելուց հետո:

Վրաստանի նախկին նախագահը բուժում է ստանում Թբիլիսիի «Վիվամեդ» կլինիկայում երկարատև հացադուլի հետևանքով առաջացած խնդիրներից։ Չնայած նրան, որ բժիշկները նախկին նախագահի վիճակը գնահատում են կայուն, նրա ախտորոշումը հայտնի չէ հանրությանը, հայտնում է Sputnik Գրուզիան։

«Նա ավելի շատ գոյատևման ռեժիմում է, քան քաղաքական ծրագրերի իրականացման։ Նա գիտակցում է, որ այստեղ գալը սխալ էր, ես բազմիցս լսել եմ դա նրանից։ Նա կարծում է, որ իրեն պետք չէր գալ», – հայտարարել է Էդուարդ Սաակաշվիլին։

Նրա խոսքով՝ այսօր նախկին նախագահի համար առաջնահերթությունը պարզապես ապրելն ու առողջությունը պահպանելն է:

«Ինձ համար դժվար է այս իրավիճակում նրան պատկերացնել որևէ քաղաքական գործունեության մեջ։ Բայց երկարաժամկետ հեռանկարում, դա կլինի Ուկրաինայում կամ ինչ-որ տեղ, չգիտեմ: Ճիշտն ասած, դա ինձ համար քիչ կարևոր է, և ինքը այդ մասին նույնպես չի անհանգստանում», – նշել Է Սահակաշվիլիի որդին։

Ինչ վերաբերում է նախկին նախագահի առողջական վիճակին, որդու խոսքով, այն վատթարացել է հուլիսից հետո:

«Նա շատ քիչ էներգիա ունի և մոռանում է ինչ-որ բաներ։ Հիվանդ մարդու տպավորություն է թողնում։ Նրան իսկապես անհրաժեշտ է նորմալ բուժում», – նշել է նա։

Սաակաշվիլիի առողջական վիճակը վատացել է 50-օրյա հացադուլից հետո, որը սկսվել էր նրա ձերբակալությունից հետո։ Ձերբակալման պատճառ են դարձել երկու քրեական գործերով դատավճիռները։

2018 թվականի հունվարին Սահակաշվիլին մեղավոր էր ճանաչվել 2006 թվականին բանկի ծառայող Սանդրո Գիրգվլիանիի սպանության համար դատապարտվածներին ներում շնորհելու, իսկ 2018 թվականի նոյեմբերին՝ պաշտոնեական լիազորությունները չարաշահելու և 2005 թվականին պատգամավոր Վալերի Գելաշվիլիին ծեծի ենթարկելով մարդու առողջությանը վնաս հասցնելու համար: