գլխավոր Իրադարձային Մենք պետք է պատժամիջոցներ կիրառենք Թուրքիայի և Ադրբեջանի ղեկավարների դեմ և Արցախը...

Մենք պետք է պատժամիջոցներ կիրառենք Թուրքիայի և Ադրբեջանի ղեկավարների դեմ և Արցախը ճանաչենք անկախ պետություն. կոնգրեսական Ջեյմս ՄաքԳովերն

Ամերիկացի կոնգրեսական Ջեյմս ՄաքԳովերնը կոչ է արել ԱՄՆ իշխանություններին պատժամիջոնցեր կիրառել թուրք և ադրբեջանցի առաջնորդների դեմ և պաշտոնապես ճանաչել Արցախի անկախությունը:

Ինչպես հայտնում է Ամերիկայի «Հայ դատի» հանձնախմբի կայքը, նման ելույթով կոնգրեսականը հանդես է եկել ուրբաթ Մասաչուսեթսում կայացած հանրահավաքի ժամանակ։

«Մենք պետք է անհատական պատժամիջոցներ կիրառենք Թուրքիայի և Ադրբեջանի ղեկավարների դեմ, սառեցնենք նրանց ակտիվներն ամերիկյան բանկերում, ֆինանսական հաստատություններում, և Արցախը մեկընդմիշտ հռչակենք անկախ պետություն»,- ասել է ՄաքԳովերն իր ելույթում:

Հիշեցնենք, որ նախորդ շաբաթ ավելի քան 100 կոնգրեսականներ և սենատորներ նման կոչերով և հայտարարություններով են հանդես եկել: Իսկ այսօր ԱՄՆ Կոնգրեսում բարձրացվել է Թուրքիային ՆԱՏՕ-ի անդամակցությունների զրկելու հարցը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 19-ի դրությամբ Արցախի զինուժը խոցել է հակառակորդի՝ 16 ուղղաթիռ, 22 ինքնաթիռ, 195 անօդաչու թռչող սարք, 566 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6259 զոհ։ Հայկական կողմից, նախնական տվյալներով, կա 729 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։