գլխավոր Իրադարձային Անդրանիկ Քոչարյանը ընդդիմության բողոքի ակցիաներին մասնակցող քաղաքացիներին կոչ արեց զգույշ լինել՝ հաշվի...

Անդրանիկ Քոչարյանը ընդդիմության բողոքի ակցիաներին մասնակցող քաղաքացիներին կոչ արեց զգույշ լինել՝ հաշվի առնելով ակցիաներում «որոշակի կոնտինգենտի» առկայությունը

ՀՀ ԱԺ  «Քաղաքացիական պայմանագիր» խմբակցության պատգամավոր Անդրանիկ Քոչարյանը ընդդիմության բողոքի ակցիաներին մասնակցող քաղաքացիներին կոչ արեց զգույշ լինել՝ հաշվի առնելով այդ ակցիաներում «որոշակի կոնտինգենտի» առկայությունը։

Նա այսպես մեկնաբանեց Ֆրանսիայի հրապարակում ընդդիմադիր շարժման տեղադրած վրաններից մեկում Երևանի ավագանու նախկին անդամ Արթուր Սեդրակյանի մահը։

Խորհրդարանական հանձնաժողովի նիստում այսօր ներկա փոխոստիկանապետ Արա Ֆիդանյանը ևս մեկ անգամ հաստատեց, որ մահը վրա է հասել գերդոզավորման հետևանքով։ Ի պատասխան՝ Քոչարյանն ասաց, որ համապատասխան կառույցներն անելիք ունեն։

«Եթե փակ տարածքներում նման կոնտինգենտ կա, ապա ինձ թվում է, որ այդ գործողություններում ներգրավված երիտասարդները պետք է հատկապես զգոն լինեն»,- նշեց Քոչարյանը։

Հիշեցնենք՝ Սեդրակյանը հանկարծամահ էր եղել սրտային սուր անբավարարությունից։ Նրա մահից մի քանի օր անց ոստիկանությունը հայտնել էր, որ նրա արյան մեջ հայտնաբերվել է բնական և սինթետիկ կանաբինոիդների խառնուրդ՝ բենզոդիազեպինի միացություններ։