գլխավոր Facebook Անելիք շատ կա. նախկին նախարարը պատգամավոր կդառնա

Անելիք շատ կա. նախկին նախարարը պատգամավոր կդառնա

 «Քաղաքացիական պայմանագիր» կուսակցության անդամ, աշխատանքի և սոցիալական հարցերի նախկին նախարար Զարուհի Բաթոյանն օգոստոսի 2-ին պաշտոնապես կստանձնի 8-րդ գումարման Ազգային ժողովի պատգամավորի պարտականությունները: Բաթոյանը Facebook–ի իր էջում գրել է, որ շատ անելիք կա։

«Նախորդ 2,5 տարիների ընթացքում կառավարության հետ հիմքեր ենք ստեղծել մի շարք համակարգային բարեփոխումների սոցիալական աջակցության, հաշմանդամություն ունեցող անձանց իրավունքների պաշտպանության, ինչպես նաև ծառայությունների բարելավման և ընդլայնման համար: Որպես պատգամավոր շարունակելու եմ աջակցել այդ բարեփոխումների իրականացմանը»,–գրել է նա։

Բաթոյանի խոսքով` սովորաբար պատերազմների և համավարակների հետևանքով ամբողջ աշխարհում խոցելիները դառնում են ավելի խոցելի, անտեսվածներն` ավելի անտեսված, ուստի Հայաստանի համար այս դժվարին իրավիճակում սոցիալական խնդիրները առավել քան երբևէ պետք է պահեն ուշադրության կենտրոնում:

Նա վստահեցրել է, որ իր ջանքերն առավելապես ուղղելու է երեխաների պաշտպանությանը, սոցիալական աջակցությանը, հաշմանդամություն ունեցող անձանց իրավունքների իրացմանը, և այն խնդիրների լուծմանը, որոնք կարևոր նշանակություն ունեն մեր քաղաքացիների համար:

Բաթոյանը 2019թ. հունվարի 18-ին էր նշանակվել աշխատանքի և սոցիալական հարցերի նախարար, իսկ 2020-ի նոյեմբերի 20-ին հայտարարել էր, որ վարչապետի որոշմամբ ազատվում է այդ պաշտոնից։

Հիշեցնենք, որ հունիսի 20-ին կայացած խորհրդարանական արտահերթ ընտրություններում անցողիկ շեմը հաղթահարել են «Քաղաքացիական պայմանագիր» կուսակցությունը (53.92%) ու «Հայաստան» դաշինքը (21.04%)։ «Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։

Նորընտիր Ազգային ժողովի առաջին նիստը կկայանա օգոստոսի 2-ին։