գլխավոր Իրադարձային Արման Թաթոյանը Կինոյի տան գլխավոր մուտքի թեքահարթակի քանդման հարցով վարույթ է սկսել

Արման Թաթոյանը Կինոյի տան գլխավոր մուտքի թեքահարթակի քանդման հարցով վարույթ է սկսել

Մարդու իրավունքների պաշտպան Արման Թաթոյանը «Հայաստանի կինեմատոգրաֆիստների միություն» ՀԿ հրապարակային դիմումի հիման վրա Կինոյի տան գլխավոր մուտքի թեքահարթակի քանդման հարցով ուսումնասիրություն է նախաձեռնել: Թաթոյանը գրառում է արել Facebook–ի իր էջում` անդրադառնալով Կինոյի տան գլխավոր մուտքի աղավաղման խնդրին։

Հարցն այն է, որ նախընտրական քարոզարշավի օրերին Կինոյի տան հարևանությամբ` Արամի և Խանջյանի փողոցների խաչմերուկում գտնվող սրճարանատերերը որոշել են Խանջյան փողոցից ևս մուտք ունենալ։ Նրանք մի քանի օրերի ընթացքում քանդել են Կինոյի տան թեքահարթակը և դրա փոխարեն սրճարանի համար աստիճաններ են կառուցել։ Որպեսզի սա շատ աչքի չընկնի, Կինոյի տան աստիճանների վրա թեքահարթակ են կառուցել, որից, սակայն, օգտվել անհնար է։

«Խնդրի բազմակողմանի ուսումնասիրության նպատակով պաշտպանի աշխատակազմի ներկայացուցիչներն ահազանգի հիման վրա տեղում ծանոթացել են խնդրին: Այցի ընթացքում արձանագրված խնդիրները քննարկվել են միության ներկայացուցիչների հետ: Արձանագրում ենք, որ քանդված թեքահարթակի փոխարեն կառուցված 2 թեքահարթակները (շենքի դիմային հատվածում և գլխավոր մուտքի աստիճանների) մատչելի, հարմար և անվտանգ չեն հաշմանդամություն ունեցող անձանց համար»,–նշված է Թաթոյանի գրառման մեջ։

Մարդու իրավունքների պաշտպանը խնդրի կարգավորման տեսանկյունից կարևոր է համարում, որ Կինոյի տան գլխավոր մուտքն ապահովող ցանկացած լուծում լինի այնպիսին, որ երաշխավորի հաշմանդամություն ունեցող անձանց ինքնուրույն տեղաշարժվելու իրավունքը մատչելի: Թաթոյանը խնդրի կապակցությամբ լրացուցիչ տեղեկությունների և պարզաբանումների պահանջով գրություններ կհասցեագրի իրավասու պետական մարմիններին: