գլխավոր Իրադարձային «Իրենց քայլերով իշխանությունները ցույց տվեցին՝ նվիրված են մնում երկիրը ապօրինություններով կառավարելու, պետությունը...

«Իրենց քայլերով իշխանությունները ցույց տվեցին՝ նվիրված են մնում երկիրը ապօրինություններով կառավարելու, պետությունը քայքայելու գործելաոճին». «Հայաստան» դաշինքը դատապարտում է Ա. Չարչյանի կալանավորումը

Երևանի ընդհանուր իրավասության դատարանն այսօր բավարարել է Հատուկ քննչական ծառայության միջնորդությունը «Հայաստան» դաշինքի անդամ, «Իզմիրլյան» ԲԿ-ի տնօրեն Արմեն Չարչյանին կալանավորելու վերաբերյալ։

«Հայաստան» դաշինքը վերոնշյալի վերաբերյալ տարածած հաղորդագրության մեջ նշում է, որ իր ընտրական ցուցակի 20-րդ համար, պրոֆեսոր Արմեն Չարչյանի կալանավորումը գնահատում է որպես բացահայտ քաղաքական հետապնդում, որը կիրառվում է փաստացի ընտրություններից աnմիջապես հետո ձեւավորված խորհրդարանական ամենամեծ ընդդիմադիր ուժի դեմ։

«Իրենց այս և անցած օրերին գրանցված այլ քայլերով իշխանությունները շատ ուղիղ ցույց տվեցին, որ նվիրված են մնում երկիրը ապօրինություններով կառավարելու, իսկ իրականում՝ պետությունը քայքայելու գործելաոճին։ «Հայաստան» դաշինքը խստորեն դատապարտում է անվանի բժիշկ Արմեն Չարչյանի կալանավորումը եւ անելու է առավելագույնը՝ արդարությունը վերականգնելու համար»,- ասված է հայտարարության մեջ:

Հիշեցնենք, որ հունիսի 18-ին ՀՔԾ-ը ձերբակալել էր Հայաստան դաշինքի անդամ, Իզմիրլյան ԲԿ-ի տնօրեն Արմեն Չարչյանին համացանցում հրապարակաված ձայնագրության հետ կապված։ Պաշտպանների կողմից վիճարկվել էր ձերբակալման իրավաչափությունը, ինչը դատարանը բավարարել էր։ Ինչից հետո ՀՔԾ-ը որոշում է կայացրել որպես մեղադրյալ ներգրավվել Արմեն Չարչյանին և քննիչի կողմից միջնորդություն է ներկայացվել դատարան Չարչյանի խափանման միջոցը կալանք ընտրելու վերաբերյալ, որը այսօր դատավոր Արմինե Մելիքսեթյանի կողմից բավարարվել է։