գլխավոր Իրադարձային Առանց Թուրքիայի՝ ՆԱՏՕ-ի համար դժվար կլինի ոչ միայն պահպանել իր ուժը, այլև...

Առանց Թուրքիայի՝ ՆԱՏՕ-ի համար դժվար կլինի ոչ միայն պահպանել իր ուժը, այլև իր գոյությունը. Էրդողան

ՆԱՏՕ-ն առանց Թուրքիայի խնդիրների առաջ կկանգնի, որոնք սպառնում են դաշինքի գոյությանը: «ՌԻԱ Նովոստի»-ի փոխանցմամբ` այս մասին հայտարարել է Թուրքիայի նախագահ Ռեջեփ Թայիփ Էրդողանը:

«Առանց Թուրքիայի՝ ՆԱՏՕ-ի համար դժվար կլինի ոչ միայն պահպանել իր ուժը, այլև իր գոյությունը: Թուրքիան ամբողջովին կատարում է իր պարտավորությունները դաշինքի առաջ: Թուրքիան ընդունում է ՆԱՏՕ-ի պահպանման կարևորությունը` անկախ այն հանգամանքից, որ միայնակ էր մնացել այն ժամանակ, երբ ամենից շատ ուներ աջակցության կարիք»,- հայտարարել է Էրդողանը` մեկնաբանելով հունիսի 14-ին Բրյուսելում տեղի ունեցած ՆԱՏՕ-ի գագաթնաժողովի արդյունքները:

Նրա խոսքով` տարածաշրջանային ճգնաժամերում` Իրաքից մինչև Սիրիա, Պաղեստինից մինչև Լիբիա, ՆԱՏՕ-ն չի կարողացել ուժեղ կամք դրսևորել, որն ակնկալվում էր իրենից:   

«Գագաթնաժողովի շրջանակում բանակցությունների ժամանակ մենք ևս մեկ անգամ մատնանշեցինք, որ «լավ ահաբեկիչներ-վատ ահաբեկիչներ» հասկացությունը սխալ է»,- ընդգծել է Էրդողանը` հավելելով, որ ակնկալում է ՆԱՏՕ-ի առավել անկեղծ և ուժեղ ներդրումը Թուրքիայում արգելված «Քրդստանի բանվորական կուսակցության» դեմ պայքարում, որին Թուրքիան ահաբեկչական է համարում: