գլխավոր Իրադարձային Ադրբեջանը միջազգային հետախուզում է հայտարարել հայկական բանակի պահեստազորի գնդապետի նկատմամբ

Ադրբեջանը միջազգային հետախուզում է հայտարարել հայկական բանակի պահեստազորի գնդապետի նկատմամբ

Ադրբեջանի իշխանությունները միջազգային հետախուզում են հայտարարել ՀՀ զինված ուժերի պահեստազորի գնդապետ Կորյուն Ղումաշյանի նկատմամբ: Այս մասին ուրբաթ հաղորդել են Ադրբեջանի գլխավոր դատախազության մամուլի ծառայությունից, գրում է ՏԱՍՍ գործակալությունը:

«Գյանջա քաղաքի ռազմական դատախազությունը քրեական գործ է հարուցել Ղումաշյանի դեմ Ադրբեջանի քրեական օրենսգրքի 120.2.1 («Սպանություն, որը կատարվել է մի խումբ անձանց կողմից նախնական դավադրությամբ»), 120.2.7 («Երկու և ավելի անձանց սպանություն»), 120.2.12 («Դիտավորյալ սպանություն ՝ ազգային, ռասայական, կրոնական ատելության կամ թշնամանքի դրդապատճառով») հոդվածներով: Դատարանի որոշմամբ Ղումաշյանի նկատմամբ խափանման միջոց է ընտրվել կալանավորումը,  նրա նկատմամբ միջազգային հետախուզում է հայտարարվել»,-ասված է հաղորդագրության մեջ:

Վարույթի պատճառ է դարձել Ղումաշյանի տված հարցազրույցը «Նոյան տապան»  երևանյան հրատարակությանը: Դրանում պահեստազորի սպան ասել է, որ իր ղեկավարությամբ Լաչինի (Բերձոր) և Քելբաջարի (Քարվաճառ) շրջաններում ականապատվել է շուրջ 500-600 հա տարածք, որոնք անցյալ տարվա վերջին անցել են Բաքվի վերահսկողության տակ, իսկ  ականների տեղափոխման համար անհրաժեշտ է եղել 17 բեռնատար:

Ինչպես ավելի վաղ տեղեկացրել էինք, Ադրբեջանի գլխավոր դատախազությունը միջազգային հետախուզում է հայտարարել Ռուսաստանի Դաշնության հայերի միության նախագահ Արա Աբրահամյանի, ինչպես նաև «Տաշիր» ընկերությունների խմբի ղեկավար Սամվել Կարապետյանի և Royalsys Engineering ընկերության ղեկավար Դավիթ Գալստյանի նկատմամբ:

2021 թվականի ապրիլի 28-ին Ադրբեջանի գլխավոր դատախազությունը քրեական գործ է հարուցել Քրեական օրենսգրքի 100.1, 218.1, 228.3, 279.1 և 206.4 հոդվածներով, իսկ գլխավոր դատախազության քննչական վարչությանը հանձնարարվել է հետաքննել գործը: Հայ գործարարների նկատմամբ կալանքն ընտրվել է որպես խափանման միջոց և հայտարարվել միջազգային հետախուզում: