գլխավոր Իրադարձային Հայաստանում քաղաքացիական բախումներ չեն լինելու, Մարտի 1 չի կրկնվելու. Փաշինյան

Հայաստանում քաղաքացիական բախումներ չեն լինելու, Մարտի 1 չի կրկնվելու. Փաշինյան

2008 թվականի մարտի 1-2-ի իրադարձությունները, երբ Երևանում զանգվածային անկարգությունների ժամանակ մարդիկ զոհվեցին, առաջիկա խորհրդարանական ընտրությունների ժամանակ չեն կրկնվի։ Այս մասին Հանրային հեռուստատեսության եթերում նախընտրական բանավեճի ժամանակ հայտարարեց ՀՀ վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը։

Ընտրություններից հետո Նիկոլ Փաշինյանը նախատեսում է հանրահավաք անցկացնել Ազատության հրապարակում: Ավելի վաղ հնարավոր «հետընտրական զարգացումների» մասին խոսել էր Փաշինյանի հիմնական մրցակից համարվող ՀՀ երկրորդ նախագահ Ռոբերտ Քոչարյանը։ Այս առնչությամբ «Լուսավոր Հայաստան» կուսակցության առաջնորդ Էդմոն Մարուքյանը Նիկոլ Փաշինյանին հարց ուղղեց, թե արդյոք 13 տարվա վաղեմության դեպքերը կրկնվելու վտանգ չունեն:

Վարչապետի պաշտոնակատարի խոսքով ՝ այդ սցենարը բացառվում է։

«Չի կարող նույն պրոցեսը տեղի ունենալ մի քանի պատճառով ։ Նախ` 2008 թվականի նախագահական ընտրությունների արդյունքները կեղծվել են, իսկ այս ընտրությունների արդյունքները չեն կարող կեղծվել, և ՀՀ քաղաքացու քվեարկությունը ճշգրիտ արտահայտվելու է ընտրական հաշվարկների ամփոփիչ արձանագրությունների մեջ»,–ասաց Փաշինյանը։

Նրա խոսքով`ՀՀ քաղաքացիները տեսնում են, որ կան քաղաքական ուժեր, որոնք փորձում են հրահրել քաղաքացիական բախումներ, քաղաքացիական պատերազմ և ըստ այդմ՝ ՀՀ քաղաքացին չի կարող քվեարկել նրանց օգտին։

Բացի այդ, ըստ Փաշինյանի`ՀՀ իրվապահ մարմինները և իրավական համակարգը միանշանակ կասեցնելու են ցանկացած ապօրինի գործողություն։

«ՀՀ–ում քաղաքացիական բախումներ չի լինելու, որովհետև ժողովուրդը հստակ մեծամասնություն է ձևավորելու»,–ասաց նա։

Հայաստանում արտահերթ խորհրդարանական ընտրությունները կկայանան հունիսի 20–ին։ Դրանց մասնակցում է 21 կուսակցություն և 4 դաշինք։