գլխավոր Իրադարձային Վարդենիսի հոգեբուժարանի աշխատակիցը 16 տարի շարունակ շահագործել է հիվանդներից մեկին

Վարդենիսի հոգեբուժարանի աշխատակիցը 16 տարի շարունակ շահագործել է հիվանդներից մեկին

Վարդենիսի նյարդաբանական տուն-ինտերնատի կադրերի տեսուչ Բեգրուհի Խլոյանը երկար տարիներ տուն–ինտերնետում աշխատելուց հետո հայտնվել է ամբաստանյալի աթոռին։

Նրան մեղադրանք է առաջադրվել այն բանի համար, որ 16 տարի անընդմեջ` 2002-2018 թթ․–ին շահագործման է ենթարկել ինտերնատի հոգեկան ֆունկցիաների խանգարմամբ տառապող բնակչուհիներից մեկին։
Նախաքննությամբ պարզվել է, որ Խլոյանը ինտերնատի տարածքում մթերային խանութ է բացել, որտեղ շաբաթը 5 օր, առանց ընդմիջման աշխատեցրել է հիվանդ կնոջը և, օգտվելով նրա վիճակից, չի վարձատրել։ 
Գեղարքունիքի մարզի իրավապահների բացահայտած այս հանցավոր արարքի նախաքննությունն ավարտվել է 2020թ–ի դեկտեմբերին։ Իսկ  2021թ–ի հունվարից մարզի ընդհանուր իրավասության դատարանում մեկնարկել է դատավարությունը։ 

Բայց անցել է շուրջ 5 ամիս, իսկ դատական պրոցեսը դեռ դոփում է տեղում։ Արդարադատությանը չի հաջողվում քննել  գործը` անվերջ ձգձգումների պատճառով։ 

Դատական գործի պաշտոնական մեկնաբանությունների համաձայն` դատական նիստերը հետաձգվում են վկաների` դատարան չներկայանալու պատճառով։ Իսկ գործով անցնող վկաները հիմնականում Բեգրուհի Խլոյանի գործընկերներն են` Վարդենիսի նյարդաբանական տուն-ինտերնատի աշխատակիցները։
Դատական վերջին նիստում` մայիսի 3-ին, դատարանն արդեն ստիպված է եղել վկաներին բերման ենթարկելու որոշում կայացնել։ 

Դատական հերթական նիստը նշանակված է վաղը` մայիսի 19–ին, ժամը 14։00։ 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է  անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: